بو منم

1ـ

منم آلوولوُ کؤینه گی اگنینده گئومات

من کی زردوشتون عدالتینه بویوُن اگمیش موغام

ظالم کوُروُشلارین سارایینا اود وورموغا قالخمیشام

منم ماد قوشوُنلارینین باشجیسی گئومات

سئپیتامه نین سسی وار سسیمده

او سس کی دونیا وار اولدوُقجا بوُ ماوی گؤیون آلتیندا قالاجاق

منم گئومات

منه ضحاک دئدیلر

ایکی چیگنیمه ایکی ایلان قوندوردولار

جاوان بئینی یئدیردیم دئدیلر

یالان دئدیلر

 !منم گئومات

عدالت بایراغینی قالخیزان ضحاک

ظالم کوُروُش سارایلارینا اود سالان سردار

بلکه مین ایل بلکه ایکی مین ایل سونرا

بئینسیز کاوه لر دؤورانیندا

خالقی چماقلارلا ازیب تاجی شاهلارا قایتاران کاوه لر دؤورانیندا

بالالاریمین بالالاری

قورخمایاجاقلار

آیاغا قالخاجاقلار

سسیمی سسلرینه قاتاجاقلار

خزردن ائکباتانا

تووروسدان کاسسا

بایراغیمی اوجالدیب

هارایلایاجاقلار

بیزیک دییه جکلر

بیزیک تاریخین اوولیندن ایندیه

اود کیمی یانیب توتوشان

عدالت ساچان اینسان

*

منم فرورتیش

کییاکسارین کولوندن قالخمیشام

دیلیمده زومرود قوشونون کهانتی وار

ظولم گؤرموش خالقلاری آلدیم بایراغیمین آلتینا

آیاقلاندیم

ظالم داریوشون سارایلارینا اود وورماغا

منی داریوش تووتدو

آسوری شاهلار سایاغینجا

قولاقلاریمی کسدی

بوُرنوُموُ کسدی

گؤزلریمی اویدو

زنجیرلدی منی وطنیم ائکباتاندا

سونرا نئیزه یه سونگویه اوتورتدو

منی سئونلری آسدیردی

آمما هر کس ائشیدسین کی

بوندان سونراکی داریوشلار کوروشلار

قورخاجاقلار سیزدن

سیز کی سسینیزده منیم سسیم وار

آرزیم قاریشیب آرزیلارنیزا

منیم بایراغیم اوجا اسه جک داغلارینزدا

 

2ـ

بوُ گلن کیمدیر

بوُ توز دومان ایچینده دؤرت نالا چاپان

تئلینه سحر گونشی بولاشان

گؤزلرینده قافلان قیرقیلاری یووالانان

سسینده آتالاریمین دستانلاری یاتان

تاریخه خط خط نیشانه سالان

بو خاتین کیمدیر

تاریخین سینه سیندن بیر قاسیرقا کیمی قوپوپ گلن

محبتتی ئورگیمده دالغالانان

بو حسرت

بو گؤرکم کیمدیر

بوُ گلن کیمدیر

*

 

!بوُ گلن منم”

تومروس آنان

سنین و آتالارینین خاتینی

من دئدیم

کوُروُشا دئدیم

سئپیتامه نین قاتیلی کوروشا دئدیم

اؤلدوردوگو سردارین آروادی

اؤز خالاسینی آرواد آلان

گؤزلری قانا دویمایان کوروشا دئدیم

دئدیم ساواش سالما

سنه وئردیگیمیز تورپاقلاردا شاه اول دئدیم

سنین آنان بیزیم قیزیمیزدی

قانع اول دئدیم

اولمادی

 آتلیلارییلا ساواشا گلدی بیزیمله

عهدینه وفا ائیلمدی

کوُروُشا دئدیم

اسیر آلدیغین اوغلومو بوراق دئدیم

یوخسا اؤز قانینا دویورارام سنی دئدیم

آمما او اوغلومون قاتیلی اولدو

“و ایندی بودور!

+

تومروس آنام آتیندان یئندی

الیندکی باشین قانا بولانمیش ساچلاریندان توتوب قالخیزدی

هارایلادی

ایندی بودور”

بیر الیمده کوروشون باشی

بیر الیمده اؤلکه مین داغی داشی

سیز منه شاهید اولون

سیز اوردولاریم

سیز اؤولادلاریم

منه شاهید اول تاریخ

من بو باشین صاحیبینه دئدیم

قان تؤکمه دئدیم

یوخسا اؤز قانینا دویورارام سنی دئدیم

+

دئدی

و کوروشون باشینی اؤز قانیلا دولو تولوغا آتدی

گؤزلری قانا دویسون دییه

بیر داها هئچ کیم قان تؤکمه یه هوسلنمه یه

 

3-

…